नेपालगञ्जको यातायात व्यवस्था कार्यालयमा भएको बम बिष्फोटमा परी एक युवकको मृत्यु भएको छ । आज दिउंसो यातायात व्यवस्था कार्यालयमा प्रेसर कुकर बम बिष्फोट हुदा युवकको मृत्यु भएको हो ।

प्रहरीका अनुसार बिष्फोट गराउन जाने क्रममा इस्तियाक खांको मृत्यु भएको हो । उनको मोबाइलबाट नाम अनुमान गरिएको हो । कर्मचारीहरु व्यस्त रहेको बेलामा बिष्फोट गराइएको थियो । बम जोड्दै गर्दा प्राविधिक त्रुटीले ती युवक मारिएको प्रारम्भिक अनुसन्धानले देखाएको छ ।

ताहचलका रितेश रौनियार र आशिष मानन्धरको हत्याको विरोधमा काठमाण्डौ तनाव ग्रस्त बनेको छ । मृतकका आफन्त, स्थानीय वासिन्दा र विद्यार्थीहरुले काठमाण्डूका विभिन्न ठाउँमा बिहानैदेखि प्रदर्शन गरिरहेका छन। प्रदर्शनकारीहरुले अहिले काठमाण्डूको त्रिपुरेश्वर, सुन्धारा, न्युरोड, कालीमाटीलगायतका ठाउँमा पर्रदर्शन गरिरहेका छन् ।

 प्रदर्शनका कारण काठमाण्डूको कलंकी, सोल्टिमोड, कालीमाटी, टेकु, कुलेश्वर, बल्खु, थापाथली, प्रदर्शनीमार्गलगायतका क्षेत्रमा गाडीहरु चल्न सकेका छैनन् भने पसलहरुसमेत बन्द भएका छन् ।

गाडीहरु चल्न नसकेपछि यात्रुहरु पैदल हिँडेरै आफ्नो गन्तव्यतिर लागेका छन् । गएको कात्तिक ३० गते छाउनी जान भनी निस्केका रौनियार र मानन्धरको शव काठमाण्डूको महादेवस्थान गाविस वडा नम्बर ५ मा रहेको मातातिर्थ नजिकैको सामुदायिक बनको खोंचमा हिजो प्रहरीले फेला पारेको हो । रौनियार बाफलमा रहेको विल्सन एकेडेमीमा र मानन्धर भुरुङ्गखेलमा रहेको न्यू जेनिस स्कुलमा कक्षा ९ मा अध्ययनरत थिए ।

आफूलाई वैदेशिक रोजगारी लगाइदिने बहानामा ठगी गरेको भन्दै पीडितहरुले लाजिम्पाटस्थित मुनड्रप्स म्यानपावरका सञ्चालक पुकार राणालाई पक्राउ गरी प्रहरीसमक्ष बुझाएका छन् । ५०/६० जनाको सङ्ख्यामा आएका पीडितहरुले सञ्चालक राणालाई बिहान साढे १० बजेतिर उनकै घर लाजिम्पाटबाट पक्राउ गरेको परिवारले जनाएको छ ।

आफूहरुलाई वैदेशिक रोजगारीमा पठाउने भन्दै मोटो रकम लिएको र अहिलेसम्म रोजगारीमा नपठाएको भन्दै पीडितहरुले राणालाई पक्राउ गरेका हुन् । अहिले राणा सिंहदरबार प्रहरीको नियन्त्रणमा छन् ।

पीडितहरुले राणालाई कुटपिटसमेत गरेका छन् । राणाले ठगी गरेको भन्दै श्रम अदालतमा दायर गरिएको मुद्दा अहिले पनि विचाराधीन अवस्थामा छ ।

प्रहरीले वरिष्ठ चिकित्सक डा. उपेन्द्र देवकोटाकी छोरी मेघा देवकोटालाई अपहरण गर्ने एकजना अपहरणकारीलाई पक्राउ गरेको छ । पक्राउ गरिएकालाई आज पत्रकार सम्मेलन गरी सार्वजनिक समेत गरिएको छ । पक्राउ पर्नेमा धनकुटाका हेमबहादुर मगर रहेका छन् । मगर विगतमा डांका मुद्धामा समेत परेका थिए । प्रहरीका अनुसार तीनजना अभियुक्त भने फरार छन् । फरार भएकामा धनकुटाका कृष्ण राई, सिदार्थ लामा, रुपन्देहीका राजु थापा र सुनसरीका केशव मगर छन् । प्रहरीले उनीहरुको खोजी गरिरहेको जनाएको छ ।

घटनाको अनुसन्धानमा डा. देवकोटाकी छोरी मेघाले महत्वपूर्ण सहयोग गरेकी थिइन् । अपहरण गरी फिरौतीवापत् एक करोड ३० लाख रकम तिरेपछि उनलाई मुक्त गरिएको थियो । मेघाकै सहयोगमा उनलाई अपहरण गरी राखिएको नख्खुस्थित भाडाको घर पत्ता लागेको थियो । पत्रकार सम्मेलनमा उपस्थित भएका डा. देवकोटाले नेपाल प्रहरीको प्रशंशा गरेका थिए । देवकोटाले प्रहरीको मनोबल उच्च राख्नुपर्ने भन्दै साधन र स्रोतको अभावमा पनि अपराधी पत्ता लगाएकोमा धन्यवाद व्यक्त गरेका थिए । प्रहरीलाई साधन र स्रोत सम्पन्न बनाएर उच्च मनोबलका साथ राख्नुपर्ने उनको सुझाव थियो । अपराधि पत्ता लगाउन सर्वसाधारणको पनि सहयोग हुनुपर्ने देवकोटाले बताएका छन् । अपहरणपछि नेपाली मिडियाले खेलेको भूमिकाप्रति भने देवकोटाले असन्तुष्टि जनाएका थिए ।

आफ्नी छोरी अपरहणमा परेपछि प्रधानमन्त्री गिरिजाप्रसाद कोइरालादेखि बेलायती राजदूतसम्मले सहानुभूती जनाएकोमा देवकोटाले धन्यवाद व्यक्त गरे । आफू नेपाल छाडेर नजाने देवकोटाले स्पष्ट पारे । उनले सुरक्षाका लागि प्रहरी र जनता मिलेर लाग्नुपर्ने बताएका छन् । गत हप्ता मेघा देवकोटा खड्ग भद्रकालीस्थित आफ्नै घरबाट अपहरणमा परेकी थिइन् । उनी रातो बंगला स्कुलमा अध्ययनरत छिन् ।

उपराष्ट्रपति परामनन्द झाले हिन्दी भाषामा सपथ लिएको विरोधमा सुरु भएको विरोध प्रदर्शनले उग्ररुप लिएको छ । आज देशभरी प्रदर्शन सुरु भएका छन् । आज विहानैदेखि काठमाडौंका विभिन्न स्थानमा प्रदर्शन सुरु भएपछि राजधानीको यातायात अस्तव्यस्त भएको छ । काठमाडौंका हरेक क्याम्पस अगाडि विद्यार्थीहरुले चक्काजाम गरी विरोध प्रदर्शन गरिरहेका छन् ।

उनीहरुले क्याम्पस अगाडि टायर बालेर विरोध प्रदर्शन गरेका छन् । कैयन स्थानमा विद्यार्थी र प्रहरीबीच भीडन्त समेत भएको छ । काठमाडौंको लैनचौरमा प्रदर्शनकारीले सरकारी गाडी तोडफोड गरेका छन् भने त्यहाँको सम्पूर्ण पसल समेत बन्द गराइएको छ । त्यस्तै, काठमाडौंको मिनभवन क्याम्पस अगाडि विद्यार्थीहरुले सरकारी मोटरसाइकल जलाइदिएका छन् ।

उता, चितवनमा प्रदर्शनकारीहरुले भारतीय नम्बर प्लेटको गाडी तोडफोड गरी क्षतिग्रस्त बनाएका छन् । चितवन, नवलपरासी, सप्तरी, सिराह, विराटनगर, झापा, पोखरालगायतका स्थानमा आज विहानैदेखि विरोध प्रदर्शन सुरु भएको छ । उपराष्ट्रपतिले हिन्दी भाषालाई स्थापित गर्न फोरमको नीति अनुसार हिन्दीमा सपथ लिएको सार्वजनिक अभिव्यक्ति दिएपछि आजबाट विरोध थप चर्किएको हो । हिजोसम्म उपराष्ट्रपतिले सार्वजनिक रुपमा माफी माग्नुपर्ने नारा लगाउने विद्यार्थी र प्रदर्शनकारीहरुले आजदेखि उपराष्ट्रपतिको राजीनामा माग्न थालेका छन् । विद्यार्थीको प्रदर्शनका कारण उहाँ आफ्नो कार्यालयमा समेत जान सक्नुभएको छैन ।

आज पनि राजधानीको मुटु मानिने रत्नपार्कमा अज्ञात ब्यक्तिहरुद्वारा बम बिष्फोट गराईएको छ । अपरान्हतिर गराईएको बम बिष्फोटमा परी एकजना ब्यक्ति घाइते भएको प्रहरीले जनाएको छ । घाईतेको उपचारका लागि बीर अस्पतालमा भर्ना गरिएको छ ।

उक्त बिष्फोट हिन्दु अतिबादी मानिने रणवीर सेनाले गराएको हुन सक्ने प्रहरीले आशंका गरेको छ। हिजो मात्र बीरेन्द्र अन्तर्राष्ट्रिय सम्मेलन केन्द्रको दक्षिणी प्रवेशद्वारमा पनि यसरीनै बिष्फोट गराईएको थियो ।

 

एमालेका वरिष्ठ नेता केपी शर्मा ओलीले माओवादीले राजनीतिक दलका वरिष्ठ नेताहरुको हत्या गर्ने योजना बनाएको खुलासा गर्नुभएको छ । झापा क्षेत्र नम्बर ७ बाट एमालेका उमेदवारसमेत रहनुभएका ओलीले आज साँझ झापाबाट राजधानी आएपछि अन्तर्राष्ट्रिय विमानस्थलमा संचारकर्मीसँग कुरा गर्दै माओवादी नेताहरुले आफ्नो हत्या हुने हल्ला गर्दै अन्य दलका वरिष्ठ नेताहरुको हत्या गर्ने योजना बनाएको रिपोर्ट आफूले पाएको उल्लेख गर्नुभयो । माओवादी नेता तथा कार्यकर्ताले चैत २८ गतेसम्म आफ्नो हत्या गर्ने सार्वजनिक उद्घोष गरेको पनि ओलीले संचारकर्मीलाई बता उनुभयो ।

माओवादीले राजावादीसँग मिलेर राजतन्त्रको आयू लम्ब्याएको पनि ओलीको आरोप थियो । संचारकर्मीसँग ओलीले मंसीर ६ गते माओवादीले निर्वाचन सार्नु राजतन्त्र बचाउने षड्यन्त्रको अंग भएको उल्लेख गर्दै चैत २८ गते जसरी पनि संविधानसभा चुनाव गर्नुपर्ने बताउनुभयो ।

ओलीले माओवादी कुनै पनि हालमा चुनाव हुन नदिने मनस्थितिमा रहेको बताउनुहुँदै चैत २६ भन्दा अगाडि अज्ञात व्यक्तिको नामबाट माओवादीले नेपालका नेताहरुको हत्या गर्ने योजना बनाइरहेको आफूले सूचना पाएको बताउनुभयो ।

जयकृष्ण गोइतको संयोजकत्वमा रहेको तराइमा सशस्त्र संघर्षरत अखिल तराइ मुक्ति मोर्चाले संविधानसभा निर्वाचनका सहभागीलाई कारबाही गर्ने धम्की दिएको छ । उसले चुनावविरुद्ध लक्षित बन्द आव्हान समेत गरेको छ ।

मोर्चाले चैत्र १६ गते देखि २९ गतेसम्म तराइ बन्दको आव्हान गरेको छ । हिजो राति वीरगंज उपमहानगरपालिकाको विभिन्न स्थानहरुमा व्यापक रुपमा उक्त सूचना लेखिएको पोष्टर टांस गरिएको छ ।

संयोजक जयकृष्ण गोइतको हस्ताक्षरयुक्त सो पोष्टरमा संविधानसभाको चुनावमा सहभागी हुनेलाई सख्त जनकारबाही गरिने उल्लेख छ । पर्चामा चैत्र १ गतेदेखि जन परिचालन, चैत्र १० गते देखि नाकाबन्दी, चैत्र १६ गतेदेखि २९ गतेसम्म तराइ बन्द भनि लेखिएको छ ।सरकारले तराइका सशस्त्र समूहसंग वार्ताको तयारी गरिरहदा गोइत समूहले चुनावविरोधी कार्यक्रम सार्वजनिक गरेको हो ।

शेखर अधिकारी

शान्ति सम्झौता र निर्वाचन आचारसंहिता विपरित भारतबाट हतियार भित्राउने काममा संलग्न रहेको भन्दै नेकपा माओवादी अवध राज्य उपसमितिले रुपन्देहीका प्रमुख जिल्ला अधिकारी ध्रुवराज वाग्लेको राजीनामा माग गरेको छ । रुपन्देही,कपिलवस्तु र नवलपरासी जिल्ला सम्मिलित अवध राज्य उपसमितिले आज बुटवलमा पत्रकार सम्मेलन गरी प्रजिअ वाग्लेको राजीनामा माग गरेको हो । चुनावको मुखमा सहमतिविपरित संकास्पद ढंगले हतियार भित्राउनु त्यसबारे बुझ्न खोज्दा निर्वाचन सामग्री हो भनी ढांट्नुले संविधानसभा निर्वाचन विरुद्ध षड्यन्त्रको रुपमा आफ्नो पार्टीले लिएको अवध राज्य उपसमिति संयोजक एवं माओवादी केन्द्रीय सदस्य देबेन्द्र पौडलले बताउनुभयो ।

माओवादी कार्यकर्ताले बुटवल योगीकुटीमा नियन्त्रणमा राखेका हतियारसहितका दुई ट्रकलाई राति ३ बजे निशेधाज्ञा जारी गरी बलजफ्ती लान खोज्दा रोक्ने क्रममा प्रहरीले लाठीचार्ज गरी पत्रकारसहित आफ्ना एक दर्जन कार्यकर्ता घाइते भएकाले उनीहरुको उपचार र क्षतिपूर्तिको माग पनि माओवादीले गरेको छ । घटनाको विरोधमा रुपन्देही,कपिलवस्तु र नवलपरासी जिल्ला आज साझ ५ बजेसम्मका लागि बन्द गरिएको छ । यस्तै कपिलवस्तुमा केही दिन अघि माओवादी कार्यकर्ता शिवपुजन कुर्मीको हत्यामा कांग्रेस केन्द्रीय सदस्य दीपकुमार उपाध्यायको प्रत्यक्ष संलग्नता रहेको भन्दै उनीसहितका दोषीलाई कारवाही गर्न पनि अवध राज्य समितिले माग गरेको छ । कुर्माको हत्यामा उपाध्यायको हात रहेको यथेस्ट प्रमाण आफूहरुसंग रहेको अवध राज्य समिति सचिव निर्मलकुमारले दावी गर्नुभएको छ । पत्रकार सम्मेलन लगत्तै माओवादीले बुटवलमा विशाल विरोध प्रदर्शन गरेको छ । प्रदर्शनमा लाठीमुङग्रीसहित सयौं वाइसीएल र माओवादी कार्यकर्ता सहभागी थिए । त्यसअघि बुटवलको राजमार्ग चौराहा,पुष्पलालचोक,अस्पताललाइन,अमरपथ,गोलपार्कका प्रहरी बिट जलाइदिएका थिए ।