धनुषा क्षेत्र नम्बर ५ मा नेकपा एमालेका उम्मेदवार रघुवीर महासेठ विजयी भएका छन्। उनले १३ हजार २ सय ३० मत प्राप्त गरेका छन्। उनको निकटतम प्रतिद्वन्द्वी तराई मधेश लोकतान्त्रिक पार्टीका श्रीकृष्ण यादवले १२ हजार १ सय ८९ मत प्राप्त गरेका छन्। 
 रामवरण यादव  राष्ट्रपतिमा विजयी भएपछि खाली भएको सो स्थानमा भएको उप निर्वाचनमा नेपाली काँग्रेसका उम्मेदवार तथा राष्ट्रपति पुत्र चन्द्रमोहन यादव भने तेस्रो स्थानमा रहेका छन्। उनले ६ हजार २९ मत प्राप्त गरेका छन्।

कास्की क्षेत्र नž १ मा माओवादी उम्मेदवार कृष्ण गुरुङ नेपाली काग्रेसका उम्मेदवार दीपक गुरुङ भन्दा मात्र ३२ मत बढी ल्याएर विजयी भएका छन्।
कृष्णको १२२५७ मत आएको थियो भने दीपकको १२२२५ मत आएको थियो। एमालेका शालिकराम पौडेलको भने ११११८ मत आएको थियो।

कास्कीको लेखनाथ नगरपालिका १३ को जनपाको चौतारोस्थित व्रम्हरुपा मावी केन्द्रको बुथमा कांग्रेसको भोट शून्य भएपछि उत्पन्न विवादका कारण २ घन्टा मतगणना स्थगित भई पुन: गणना भएको थियो।

निर्वाचन आयोगका प्राविधिकहरुले मेसिनले झुट नबोल्नेबारे आफूहरुलाई कन्भिन्स गराएकाले पुन: गणनाका लागि सहमत भएको कास्की काग्रेसका सभापति यज्ञबहादुर थापाले बताएका थिए। 

यसैगरी संविधानसभाको उपनिर्वाचनमा मोरङ ७ मा नेपाली कांग्रेसका डा. शेखर कोइराला विजयी भएका छन्। कञ्चनपुर-४ मा एकीकृत नेकपा माओवादीका हरिश ठकुल्ला (कमल क्षेत्री) र मोरङ- ५ मा मधेशी जनअधिकार फोरमका जयराम यादव विजयी भएका छन्।
मोरङ  ७ मा कोइरालाले १२०६१ मत ल्याई विजयी भएका हुन्। उनका निकटतम प्रतिद्वन्द्वी फोरमका उम्मेदवार चुमनारायण तवदारले ११३९० मत ल्याएका थिए। एकिकृत नेकपा माओवादीका विजय थारु तेस्रो स्थानमा र एमालेका विनोद ढकालले चौथो स्थानमा रहे।
कोइराला यसअगाडि संविधानसभामा सोही निर्वाचन क्षेत्रमा मधेसी जन अधिकार फोरमका विजय गच्छदारसँग पराजित भएका थिए।

मोरङमा ५ मा १३ हजार ८ सय ११ मत ल्याई फोरमका जिल्ला अध्यक्ष समेत रहेका जयराम यादव उपनिर्वाचनमा विजयी बनेका हुन्। उनका समर्थक र सहयोगीहरुले शनिबार बिहानैदेखि नै खुशीयाली मनाइरहेका छन्।

संविधानसभाको निर्वाचनमा उक्त क्षेत्रबाट फोरम अध्यक्ष उपेन्द्र यादव विजयी भएका थिए। उनका प्रतिद्वन्दी एकिकृत नेकपा माओवादीका शिवकुमार मण्डलले ८३३१ मत, काग्रेसका जगन्नाथ सिंहले ५५४४ मत, तमलोपा उमेस गिरीले २८०१ मत र एमालेका जिवन घिमिरेले ३५७० मत ल्याएका छन्।

संविधानसभाको उपनिर्वाचन मोरङको दुवै क्षेत्रमा शुक्रबार शान्तिपूर्ण रुपमा सम्पन्न भएको थियो। यस्तै दुवै क्षेत्रमा ५० दशमलव ६८ प्रतिशत मत खसेको जिल्ला निर्वाचन कार्यालय मोरङले जनाएको छ । मोरङ क्षेत्र नम्बर ५ मा ६७ हजार तीनसय ९७ मतमध्ये ३९ हजार पाँच सय ५८ मत खसेको छ । क्षेत्र नम्बर ७ मा ७१ हजार नौ सय ९३ मतदातामध्ये ४१ हजार ८८ मत खसेको छ।