८१ औं ओस्कारको उपाधि स्लमडग मिलेनियर´ ले जितेको छ । उत्कष्ट फिल्म सहित ८ वटा अवार्ड जितेको छ। मुम्बईको झुपडी वस्तीको केटाले गेम शोमा दुई करोड जितेको कथामा बनेको यो फिल्मका लागि बेलायती निर्देशक ड्यानी वोयलले उत्कृष्ट निर्देशकको अवार्ड जितेका छन्।

यसैका लागि सिमोन वोयफीले उत्कृष्ट ´एडप्टेड´ पटकथाको अवार्ड जितेका छन्। यसैका लागि भारतीय संगीतकार एआर रहमानले दुई ओस्कर जितेका छन्। ´स्लमडग मिलेनियर´ का लागि उनले उत्कृष्ट संगीत र गीत दुवै ओस्कर जिते। यो फिल्मको ´जय हो´ बोलको उनको गीत उत्कृष्ट छानियो। यसका साथै यो गीत लेख्ने गीतकार गुलजार र गायक सुखविन्दर सिंह पनि ओस्कर विजेता भएका छन्।

दश विधामा मनोनित स्लमडगले सिनेम्याटोग्राफी, सम्पादन र ध्वनी मिश्रणमा पनि अवार्ड पाएको छ। सन पेनले उत्कृष्ट अभिनेताको ओस्कर जितेका छन्। उत्कृष्ट अभिनेत्रीको अवार्ड ´द रिडर´ का लागि केट विन्स्लेटले पाइन्। सहअभिनेताको अवार्ड ´द डार्क नाइट´ का लागि दिवंगत हिथ लिजरले पाए भने सहअभिनेत्री ´विकी क्रिस्टिना वार्सिलोना´ का लागि पेनिलोप क्रुजले पाइन्।

मौलिक पटकथाको अवार्ड ´मिल्क´ ले जितेको छ। समलिङि्गी अभियन्ताको जीवनीमा आधारित यो फिल्मका लागि डस्टिन ल्यान्स व्ल्याकले ओस्कर जितेका छन्। पटकथामा पनि अवार्ड पाउने मानिएको ´वाल इ´ ले भने उत्कृष्ट एनिमेटेड फिल्मको अवार्ड जितेको छ। विदेशी भाषाको फिल्मको दावेदार मानिएको इजरायलको ´वाल्ट्ज विथ वसिर´ भने पछि पर्यो। यसलाई उछिन्दै जापानको ´डिपाचर्स्´ले ओस्कर जित्यो।