संयुक्तराज्य अमेरिकाका नवनिर्वाचित राष्ट्रपति बाराक ओबामालाई टाइम पत्रिकाले यस वर्षको "वर्षव्यक्ति"घोषित गरेको छ । पत्रिकाका अनुसार अप्ठ्यारो परिस्थितिमा उनी जनताका लागि आशाका किरणसमान छन् । अहिलेको असहज परिस्थितिबाट ओबामाले आफूहरूलाई बाहिर निकाल्छन् भन्ने विश्वास अमेरिकी जनतालाई भएको पनि टाइम पत्रिकाले लेखेको छ । पछिल्लो वर्ष रुसका प्रधानमन्त्री भ्लादिमिर पुटिन टाइम पत्रिकाको "वर्षव्यक्ति" घोषित भएका थिए । दुई वर्षअगाडि मात्र अमेरिकाका आधाजसो जनताले नाम नसुनेका ओबामा अहिले सार्वजनिक जीवनमा छाएको पत्रिकाले लेखेको छ । टाइम पत्रिकाको अन्तर्राष्ट्रिय संस्करणका सम्पादक मिसेल इलियट भन्छन्- "बाराकको कथा सामान्य छैन ।

उनले जकार्तादेखि डर्बिलन र ओहायोदेखि लिएर न्युहाम्सायरसम्म सबैलाई प्रभावित गरे । बाराक ओबामाप्रति मानिसको एक किसिमको उत्साह छ । जसलाई हामी आफूले मन पराएको व्यक्ति बनाउन चाहन्थ्यौँ"। पछिल्लो दुई वर्षमा टाइमको कभरमा मात्र ओबामाको तस्बिर १५ पटक छापिएको थियो । यो कुनै पुरस्कार नभएर विश्वमा हुने घटनालाई प्रभावित गर्ने व्यक्तिलाई वर्षव्यक्ति घोषित गर्ने गरिएको टाइम पत्रिकाले जनाएको छ ।

 सन् १९२७ यता टाइम पत्रिकाले प्रत्येक वर्ष "वर्षव्यक्ति" घोषणा गर्दै आएको छ । २००५ मा माइक्रो सफ्टका संस्थापक बिल गेट्स, उनकी श्रीमती मिलिन्डा र रक-स्टार बोनो वर्षव्यक्ति घोषित भएका थिए । २००४ मा अमेरिकी राष्ट्रपति जर्ज डब्लु बुस वर्षव्यक्ति घोषित भएका थिए भने २००३ मा अमेरिकी सैनिक वर्षव्यक्ति घोषित भएका थिए । १९३८ मा हिटलर टाइम पत्रिकाको वर्षव्यक्ति घोषित भएका थिए भने १९७९ मा इरानका धार्मिक नेता आयतुल्ला खामेनी वर्षव्यक्ति घोषित भएका थिए।