गृहमन्त्री वामदेव गौतमले उपत्यकामा रहेका पूर्वराजाहरूको सालिक ढालिने बताएका छन् । राजधानीमा शनिबार शंखधर साख्वाको सालिक शिलान्यास गर्दै गौतमले भने, ‘चोक-चोकमा उभिएका पूर्वराजाका सालिक निरंकुशताका अवशेष हुन्, निरंकुशताका अवशेष सडक चोकमा राख्नहुन्न, उखेलेर म्युजियममा राख्नुपर्छ ।’ यदि नागरिकले माग गर्ने हो भने उपत्यकामा रहेका सबै पूर्वराजाका सालिक हटाएर देशका लागि बलिदानी दिनेको सालिक राख्न सरकार तयार रहेको गौतमले बताए ।

उनले नयाँ सरकार भए पनि कार्यशैली पुरानै भएकाले तत्काल परिवर्तन दिन नसकिएको धारणा राखे । सरकार परम्परागत संस्कार परिवर्तनको पक्षमा रहेको र सुधारका लागि गृहकार्य गरिरहेको दाबी गर्दै गृहमन्त्री गौतमले नागरिकले केही समयमा नै परिवर्तनको आभास पाउने उल्लेख गरे ।

नागरिकको सहयोगले उपत्यकाको शान्तिसुरक्षामा क्रमिक सुधार भएको उनको दाबी थियो । उपत्यकाको शान्तिसुरक्षामा परिवर्तन भए यसको प्रभाव देशभर पर्ने बताउँदै उनले सरकार जुनसुकै सर्तमा पनि शान्तिसुरक्षा बहाल गर्ने पक्षमा रहेको उल्लेख गरे । उनले भने, ‘सरकार सुरक्षा दिन तत्पर छ, तर त्यसका लागि नागरिक अझ जागरुक हुन आवश्यक छ ।’