दिलवाला छन् ओबामा
अमेरिकी जनताले सोचेभन्दा धेरै गुणा बढी नेपालमा नेपाली जनता, अझ नेपाली राजनीतिमा पटक्कै चासो नभएकाहरू पनि नोभेम्बर ४ मा हुने अमेरिकी राष्ट्रपतिय नर्वाचनको व्यग्रताका साथ प्रतिक्षा गरिरहेका छन् । यो प्रतिक्षामा निर्वाचन जितेमा इतिहास बनाउने डेमोक्र्याट उम्मेदवार बाराक ओबामाको मुस्कानले काम गरेको छ भन्दा धेरैलाई रमाइलो लाग्ला । हुनसक्छ, तपाईलाई पनि आश्चर्य लागिरहेको छ । तर क्याफे पुस्ताहरू पनि ओबामाको भाषण गर्ने शैली, ओबामाको मुस्कान र उनी निकै ह्याण्डसम भएको चर्चा गर्छन् । नेपाली राजनीतिमा पोशाकको चर्चा नभए पनि नेपालीहरू अमेरिकी राष्ट्रपतिका उम्मेदवारको पोशाकबाट पनि प्रभावित छन् । अमेरिका बसोबास गरिरहेका नेपालीहरूले त बाराक ओबामाले जित्ने कुरामा आफुहरू निकै ढुक्क भएको बताएको नेपाली संचार माध्यमहरूले जनाएका छन् ।
हालैको एउटा दिनमा चर्को घामबाट शितलता पाउन नयाँ बानेश्वरको रोजमेरी क्याफेमा लस्सी पिइरहेका दुईवटी युवतीले बाराका ओबामालाई जिताउन अमेरिकामा भएको भए ‘फेक’ मतदान गर्ने हिम्मत गर्ने कुरा गरे । नोबल कलेजकी विद्यार्थी रेसा महर्जन बाराकको मुस्कानबाट यति प्रभावित छिन् कि उनी ओबामालाई जिताउन ‘सानोतिनो’ अपराध गर्न पनि तयार छिन् । उनलाई ओबामाको चेप्टो दाँत खास मन पर्दैन तर मुस्कानमा दाँतको मात्र भुमिका हुँदैन रे !
रेसाकी साथी एलिसा बस्नेतको भने अर्कै कारण छ, ओबामालाई मन पराउनमा । उनलाई लाग्छ, ओबामामा साच्चैको केहि गरौ भन्ने भावना छ रे जुन उनले महशुस गरेकी छिन् । नेपाली नेतामा त्यस्तो कोहि छ ? मेरो प्रश्न सुनेर एलिसा अलमलिइन । ’नेपाली नेताको ‘पर्सनालिटी’ नै छैन‘, यो जवाफ रेसाको हो ।
नेपाली नेताहरू पोशाकका बारेमा सोच्दैनन् । बेढंगका पोशाक लगाउनुलाई यहाँका नेताहरू सर्वहारा भएको पनि गर्व गर्छन् । कसैले मिलाएर पोशाक लगाए भने पुँजीपतिको आरोप खेप्नु पर्ने हुन्छ । अनि यहाँ महंगा लुगा लगाउनु फ्यासन कन्सस हुनु हो भन्ने गलत सोचाइ छ । त्यसो त चुनाव ताका यहाँ पोशाकको बारेमा टिप्पणी गर्ने फुर्सद कसैलाई हुन्न । आजभोली हुनसक्छ, पश्चिमा मुलुकको प्रभावले फाट्फुट् लेख नेताका पोशाक सम्बन्धमा आउने गर्छन् । यसबाहेक नेपाली राजनितीमा व्यक्तित्व र पोशाकले खासै महत्व राख्दैन । तर यो कुराले नेपाली युवा पुस्तालाई प्रभावित गरेको रहेछ भन्ने कुरा यी दुई युवतीका कुराले संकेत गर्छ ।
नेपाली छापाले नबिराइकन बाराक ओबामाका राम्रा पक्षको बारेमा चर्चा गरेका छन् । अझ भन्ने हो भने मेक्केनका नराम्रा समाचार पनि प्राथमिकताका साथ छापिएका छन् । मेक्केनलाई नेपाली छापाले घमण्डी, बुढो उम्मेदवारको रूपमा परिभाषित गरेको छ । नेपाल सरकारको कुनै स्पष्ट निति नभएपनि नेपाली जनता भने चाहे इराक होस या अन्य कुनै मुलुक, चाहे अमेरिकाले होस चाहे बेलायतले कसैले कुनै बहानामा आक्रमण नगरोस भन्ने चाहन्छन् । नेपाली जनताले ओबामाले इराक र अफगानिस्तानमा बमबारीका घटनाको अन्त्य गर्नेछन् जुन बुस प्रशासनको ठ्याक्कै कपी गर्ने मेक्केनले गर्दैनन् भन्ने बुझाइ राख्छन् । तर बाराकले इराकबाट सेना फिर्ता गर्ने भने पनि अफगानिस्तान वा पाकिस्तानमा थप सेना परिचालन वा आक्रमण गर्ने कुरा गरिसकेका छन् । ओबामाको विजयले सम्पुर्ण रूपमा युद्धको अन्त्य भन्ने होइन ।
ओबामा मेक्केन भन्दा अगाडी छन् सर्वेक्षणहरूमा । बाराकलाई जोन एफ केनेडीसँग तुलना गर्नेहरू पनि छन् । उनले परिवर्तनको नारालाई यसरी ब्याख्या गरेका छन् कि सबै उमेर समुहलाई उनले प्रभावित पारेका छन् । रोजमेरी क्याफेका यि दुई युवतीलाई यी कुरादेखि खास सरोकार छैन । उनीहरू जसरी पनि ओबामाले जित्नुपर्छ भन्ने ठान्छन् किनकी ओबामा जवान् छन् । मेरो एउटा ताइवानी साथीले मलाई सोध्यो, ‘तिमी किन मेक्केनलाई समर्थन गर्दैनौ?’ यसको मतलव ऊ जान्दथ्यो कि मेरो समर्थन ओबामालाई छ । ‘सायद मेक्केन बुढो भएकाले!‘यो मेरो ठट्टा थियो तर ओबामा जवान हुनु मात्र म उनको समर्थक हुनाको कारण होइन, तर ओबामा जवान हुनु पनि एउटा कारण हो । नेपाली राजनीतिमा पनि बुढाहरूको हावी हुनुले पनि कहिँ कतै विकासको बाटो छेकेको आभाष हुन्छ ।
रिपब्लिकन उप-राष्ट्रपति उम्मेदवार सराह पेलिन पनि नेपाली क्याफे पुस्तामा चर्चाको बिषय बनेकी छिन् । पाँचवटा बच्चाकी आमा भएर पनि कस्ति जवान ! पेलिनको बारेमा भएका टिप्पणी उनको राजनीतिक बिचार भन्दा पनि उनको फेसनसँग सम्बन्धित छन् जुन अहिले विश्वका सम्पुर्ण संचार माध्यमहरूले गरिरहेका छन् । पेलिनले ग्ल्यामरका लागि खर्च गरेको १ लाख ५० हजार अमेरिकी डलरको खबर पनि रेसा र एलिसाले थाहा पाइसकेका छन् । जबकी नेपालको एक प्रमुख साप्ताहिकले ‘सुजाता कोइरालाको युवराज्ञी सपिङ’ का बारेमा कभर स्टोरी नै गरेको थियो, त्यसको बारेमा उनीहरूलाई अत्तोपत्तो छैन। पंक्तिकारले जानाकरी दिदा दुबैले जिब्रो टोके र भने, ‘को हो सुजाता कोइराला?’
अनि चाहिँ मैले जिब्रो टोके ।दुबै केटीहरू अमेरिका जान चाहन्छन् र ओबामाले आप्रवासीका लागि लचिलो निती ल्याउने कुरामा उनीहरू ढुक्क छन् । यो पो रहेछ, बाराकको लोकप्रियताको कारण?
मेरो प्रश्नमा दुबै ठिटीले अप्ठेरो माने तर ५० % भन्दै आफ्नो बचाउ पनि गरे । जेहोस्, ओबामा कालो हुनुले नेपालीलाई केहि असर गर्दैन । उनी दिलवाला छन् र अमेरिको ‘एरोगेन्ट’ छवीलाई उनको वीजयले सुधार गर्नेछ भन्ने नेपालीको आशा छ । सायद यी दुईवटी केटीको पनि ! मेरो पनि !