कोइरालाले शनिवार बालुवाटार छाड्ने
प्रधानमन्त्री गिरिजाप्रसाद कोइरालाले शनिवार प्रधानमन्त्री निवास बालुवाटार छाड्ने हुनुभएको छ । उहाँ प्रधानमन्त्री नहुने पक्का भए पछि आजबाटै उहाँले निवासमा रहेको आफ्नो सामान सार्न सुरु गर्नुभएको हो । उहाँ महाराजगञ्जस्थित भतिजा शेखर कोइरालाको निवासमा सर्दै हुनुहुन्छ । प्रधानमन्त्रीमा नेपाली कांग्रेसले उम्मेदवारी दिने अवस्था आए पनि कोइराला उम्मेदवार नबन्ने निर्णयमा पुग्नुभएको कारण उहाँले प्रधानमन्त्री निवास बालुवाटार छाड्ने निर्णय गर्नुभएको बताइएको छ । सुक्रबार साँझसम्ममा नयाँ प्रधानमन्त्री चयन भइसक्ने भएका कारण प्रधानमन्त्री कोइरालाले निवास शनिवार नै छाड्न लाग्नुभएको बालुवाटार स्रोतले बताएको छ । ४६ साल पछि पटकपटक प्रधानमन्त्री भइ बालुवाटारमा बस्नुभएका कोइराला उमेरका कारण पनि सम्भवतः बालुवाटारको बसाइँ यो अन्तिम हुन सक्ने बताइएको छ ।