कोइराला राजनीतिक भेटघाटमा
प्रधानमन्त्री गिरिजाप्रसाद कोइरालाको दुई दिने राजनीतिक सक्रियतापछि साउन २४ गते प्रधानमन्त्री निवास बालुवाटार सुनसान बनेको छ । बालुवाटारमै रहेका नेपाली कांग्रेसका सहमहामन्त्री अर्जुननरसिंह केसीले आज प्रधानमन्त्रीको राजनीतिक भेटघाट नरहेको उल्लेख गरे । ‘सबै साना दलसँग एक चरण भेटघाट सक्नुभयो, आज कसैसँग उहाँको भेटघाट छैन’ केसीले भने । बालुवाटारमा अहिले कांग्रेस केन्द्रीय समितिको बैठक चलिरहेको छ ।
उता, आज बिहान १० बजेदेखि सुरु हुने भनिएको प्रमुख चार दलको बैठक अझै सुरु भएको छैन । हिजो ठमेलको होटल बैशालीमा भएको माओवादी, नेपाली कांग्रेस, एमाले र मधेसी जनअधिकार फोरमका शीर्ष नेताको बैठक आज हुनेगरी स्थगित भएको थियो । राष्ट्रपति डा. रामवरण यादवले सहमतिको सरकार बनाउन दिएको दोश्रो म्याद आज सकिदैछ ।