इन्धन आपूर्ति सहज बनाउन ४६ करोड निकासा
पेट्रोलियम पदार्थको आपूर्तीलाइ सहज बनाउन सरकारले नेपाल आयल निगमलाई सोमबार ४६ करोड रुपियाँ निकासा गरेको छ ।
उद्योग, वाणिज्य तथा आपूर्ति मन्त्रालयले दिएको जानकारीअनुसार नेपाल आयल निगमले भारतीय आयल निगमलाई बक्यौता रकम तिर्न नसकेपछि पेट्रोलियम पदार्थको आयातमा कमी आएको कारण नेपाल आयल निगमलाई सरकारले ऋण स्वरूप सो रकम निकासा गरेको हो ।
यसअघि नेपाल सरकारको मन्त्रिपरिषद्ले नेपाल आयल निगमलाई एक अर्ब रुपियाँ दिने निर्णय गरेको थियो । हाललाई पेट्रालियम पदार्थको आयातलाई सहज होस् भन्नाका लागि ४६ करोड रुपिया निकासा दिइएको र बाँकी रकमको निकासाका लागि प्रक्रिया सुरु भइसकेको बताइएको छ ।
हाल निगमले पैसा तिर्न नसकेका कारण करिब ८० प्रतिशत आयातमा कमी आएको थियो । तत्काल सरकारबाट प्राप्त भएको रकम बुझाएपछि विस्तारै ५० प्रतिशतभन्दा बढीसम्म आयात बढाउन सकिने कुरा निगम स्रोतले जनाएको छ ।