माण्डवी त्रिपाठी पोहोर साल यो सिजनमा निकै व्यस्त थिइन् । तीज नजिकिँदै गएकोले विभिन्न स्टुडियोमा तीजको भाका उराल्दैमा दिन बितेको पत्तो पाउँदिन थिइन् । तर, यसपालि पोहोरको जस्तो चटारो छैन । ‘यसपालि त तीजको रमझमले छोएन, नाच्ने-गाउँने अर्को वर्ष गर्नुपर्ला,’ उनले भनिन् । यो फुर्सद अरूको कारण मिलेको होइन । आफ्नै काम परेकाले फुर्सदमा भएको बताइन् । भन्छिन्, ‘आफ्नै सोलो एल्बमको तयारी गर्दैछु, त्यही कारण अरू गीत गाइनँ ।’ दसं छेको पारेर नयाँ एल्बम ल्याउने सुरमा छिन् उनी । लोक, आधुनिकदेखि सिनेमाका गीतमा समेत स्वर दिएकी छिन् उनले । उनलाई चिन्नेहरू भने लोकगायिका भन्छन् । लोकबाहेकको पाटो छोपिएकोमा नरमाइलो लाग्दैन ? ‘अँहँ, लोकगीत भनेको ठेट गीत हो । मलाई त लोकगायिका भन्दा रमाइलो लाग्छ ।’ अरूको अनुमान ठीकै भएको धारणा राखिन् ।

एउटा गीत गाएबापत् उनको पारिश्रमिक कति होला ? भन्न चाहिनन् । अवय ढुंगेलसँग मिलेर ‘सुपारी जाईको…’ गीतबाट औपचारिक रूपमा लोकगीत गाउन सुरु गरेकी थिइन् उनले । अहिलेसम्म आठ सयभन्दा बढी गीतमा स्वर दिएकी माण्डवीले दिनमा तीनवटासम्म गीत गाएकी रहेछिन् । कहिलेसम्म गाउलिन् ? ‘खै, थाहा छैन, कहिलेसम्म हुन्छ ? जहिलेसम्म सक्छु, त्यही बेलासम्म गाउँछु ?’ उनले भनिन् । गाउनुअघि शब्द हेर्ने बानी छ उनको । शब्द राम्रो भयो भने गीत पनि राम्रो हुन्छजस्तो लाग्दोरहेछ उनलाई । शब्द चित्त नबुझेकै कारण अहिलेसम्म एउटै गीत गाउँदिनँ भनेको रेकर्ड रहेनछ । किन त ? भन्छिन्, ‘कसैको गीत भएन भन्दा चित्त दुःखाउलान् कि भन्ने डर लाग्छ, आफूलाई राम्रो नलागे पनि गाइदिन्छु ।’ उनका गीत सुनेर श्रोता जति मख्ख छन्, परिवारका सदस्य पनि कम्ती खुसी छैनन् । उनका बुबा शम्भुप्रसाद त्रिपाठी जमानाका नामी भजन गायक रै’छन् । बुबाकै प्रेरणाले संगीतमा लागेकी हुँ भन्ने माण्डवीले आफ्नो नयाँ गीत सुनेर आमाले समेत कमेन्ट गर्ने गरेको बताइन् ।

लोकगीतमा धेरैजसो मायाप्रेमकै भाव समेटिएको हुन्छ, दर्जनौं प्रेमका गीत गाएकी माण्डवीले अझै कसैकी प्रेमिका हुन सकेकी रै’नछिन् । तर, गीत सुनेर ‘आऊ हामी प्रेम गराँ’ भनेर प्रस्ताव राख्ने धेरै छन् । प्रेमका लागि अपिल गर्नेको आग्रह स्वीकार नगरेको बताइन् । उनी आफंले पो कसैसँग आग्रह गरेकी छिन् कि ? हाम्रो जिज्ञासपछि मुस्कुराउँदै भनिन्, ‘त्यतातिर ध्यानै दिएकी छैन ।’