माओवादीका वरिष्ठ नेता रामबहादुर थापा बादलले उपराष्ट्रपतिले हिन्दी भाषामा सपथ खाएको बिरुद्ध बिद्यार्थीहरु आन्दोलित हुनुपर्ने बताएका छन् । माओवादीसम्बद्ध अनेरास्ववियू क्रान्तिकारीले राजधानीमा चितवनका सभासदहरुलाई साउन ११ गते गरेको सम्मान कार्यक्रममा बोल्दै बादलले झाले हिन्दी भाषमा सपथ खानु राष्ट्रियतामाथि खतरा भएको उल्लेख गरे । ‘अहिले उनी नेपाली भाषा नै बोल्न आउदै भन्दैछन्, नेपाली बोल्न नआउने मानिसले त्यत्रो वर्ष न्यायसम्पादन कसरी गरे’ बादलले प्रश्न गरे । उपराष्ट्रपति झाले सपथ खाँदा हिन्दी भाषा प्रयोग गरेकोबिरुद्ध सबै प्रमुख राजनीतिक दलसम्बद्ध बिद्यार्थी संगठनहरु संयुक्तरुपमा आन्दोलित छन् भने सर्वोच्च अदालतमा पनि त्यसबिरुद्ध मुद्धा परेको छ ।

कार्यक्रममा बादलले माओवादीलाई सबै शक्तिले घेरावन्दीमा पार्न खोजेको तर, बिस्तारै घेरावन्दीमा पार्ने शक्ति नै घेरामा पर्न सक्ने पनि उल्लेख गरे । बादलले आफ्नो दलसँग शक्ति बाँडफाँडमा कुरा नमिलेपछि मधेसवादी दलहरु नेपाली कांग्रेस र एमालेको गठवन्धनमा सामेल भएको पनि बताए । एमालेसँग समझदारी भंग हुनुमा पनि बादलले शक्ति बाँडफाँड नमिल्नु कारण भएको स्पष्ट पारे ।