नेकपा माओवादीले राष्ट्रपतिको अडान छाडेको छ । आज नेकपा माओवादीको केन्द्रीय कार्यालयमा बसेको पांचघण्टा लामो सचिवालय बैठकपछि उसले नागरिक समाज या तटस्थ व्यक्तिबाट राष्ट्रपति चयन गर्नुपर्ने प्रस्ताव अघि सारेको छ ।

माओवादी प्रवक्ता कृष्णबहादुर महराले संवैधानिक राष्ट्रपतिको दाबी छाडे पनि नागरिक समाजका व्यक्तित्वलाई राष्ट्रपति चयन गर्नुपर्नेमा जोड दिएका छन् । उनले संविधान संशोधन गरी साधारण बहुमतबाट सरकार हटाउन र बनाउने प्रावधानमा जान नसकिने बताएका छन् । यसअघि माओवादीले राष्ट्रपति र प्रधानमन्त्री दुवै पदको दाबी गरेको थियो ।

माओवादीले आफ्नो अडान छाडेपछि दलहरुबीच सहमतिको ढोका खुलेको माओवादीले बताएको छ । तर, संविधानबाट दुइतिहाइको प्रावधान हटाउने अन्य दलको अडान यथावत रहेको छ । यसैबीच, माओवादीले राष्ट्रपतिको दावी छोडेपछि प्रधानमन्त्री प्रचण्ड बन्ने वा नबन्ने निर्णय छब्बीस गते बस्ने केन्द्रीय समितिको बैठकले गर्ने माओवादीले बताएको छ ।