माओवादीका वरिष्ठ नेता मोहन बैद्य किरणले जेठ १५ गतेअघि राजाले नारायणहिटी नछाडे उनलाई कानुनी प्रक्रियाबाट हटाइने बताएका छन् ।  राजधानीमा आयोजित अन्तरक्रियामा बोल्दै किरणले राजा हटाउनु कुनै ठूलो कुरा नभएको दावी गरे । उनले १५ गते अघि नै राजा हटाउन आफूहरुले वातावरण बनाइरहेको पनि उल्लेख गरे ।

कार्यक्रममा किरणले संविधानसभा चुनावअघिको सहमति बिपरित अन्य दलहरुले वाईसीएल बिघटन जस्ता र्सत राखेको बताए तथा अन्य दलले चाहे पनि संविधानसभामा दुई तिहाई नपुग्ने तर माओवादीले चाहे दुई तिहाई पुर्‍याउन सक्ने दावी गरे । ‘कसैले फुर्ति नलगाए हुन्छ, अरु दल आउदैनन् भने माओवादी एक्लैले सरकार बनाउनेछ तथा चलाउनेछ’ किरणले भने ।

कार्यक्रमका अर्का वक्ता नेपाली कांग्रेसका सहमहामन्त्री तथा प्रवक्ता अर्जुननरसिंह केसीले तीस प्रतिशत मात्र मत ल्याएको माओवादीले झुठ र भ्रमको खेती गर्दै तथा सपना बाढदै हिड्नु बेकार भएको बताए । संविधानसभा चुनावपछि पनि पार्टीका कार्यकर्ताको घरमा माओवादीले आगो लगाएको तथा कार्यकर्तालाई कुटपिट गरेको उल्लेख गर्दै केसीले शान्तिप्रक्रियालाई निश्कर्षमा पुर्‍याउन कांग्रेसले चुनावअघि लचकता देखाए जस्तै माओवादीले पनि अब लचकता देखाउनुपर्ने माग गरे । ‘माओवादीले अझै दम्भ त्याग्दैन भने कांग्रेस आत्मार्समर्पण गर्दैन, बरु जंगल पस्छ’ केसीले चेतावनी दिए ।

एमाले स्थायी समिति सदस्य केशव बडालले माओवादीको ज्यादति नरोकिएका कारण एमाले माओवादीको नेतृत्वको सरकारमा जाने सम्भावना कम रहेको बताए । बडालले केही महिनापछि हुने महाधिवेशनसम्म पार्टीको नेतृत्व स्थायी समिति सदस्य झलनाथ खनालले गर्ने सम्भावना रहेको जानकारी दिए ।