चुनावी अभियानको लामो तिक्कता र दुश्मनीपूर्ण अभिव्यक्तिको श्रृंखला नटुट्दै नेकपा माओवादीका अध्यक्ष प्रचण्ड आज अचानक एमाले महासचिव माधवकुमार नेपालको निवास कोटेश्वरमा पुग्नुभएको छ । एमाले महासचिव माधव नेपालसँगको भेटघाटको सुरुमै प्रचण्डले आफ्ना कार्यकर्ताबाट भएको ज्यादतीको छानविन गर्ने र कारवाही गर्ने बताएर कुराकानीको वातावरणलाई सहज बनाउनुभएको थियो ।

कुराकानीको क्रममा नेकपा एमालेका महासचिव माधवकुमार नेपाल र माओवादी अध्यक्ष प्रचण्डबीच संविधानसभाको चुनावमा दुइ पार्टीबीच तालमेल गर्ने विषयमा गम्भीर छलफल भएको थियो ।

भेटवार्तामा चुनावमा दुइ पार्टीबीचको चुनावी तालमेलको विषयमा र सात राजनीतिक पार्टीहरुको बीचमा समेत चुनावी तालमेल गर्ने विषयमा छलफल भएको थियो । यस विषयमा भोलि नै प्रधानमन्त्री गिरिजाप्रसाद कोइरालासँग माधव नेपाल र प्रचण्डले भेट गर्ने र तालमेलको सम्बन्धमा निर्णायक वार्ता गर्ने सहमति समेत भएको छ ।

दुइ नेताको छलफलका क्रममा नेकपा एमालेका महासचिव माधवकुमार नेपालले आपसी असमझदारी हटाइ स्वस्थ प्रतिस्पर्धाबाट चुनावमा जानुपर्ने बताउनुभएको थियो । त्यस्तै माओवादी अध्यक्ष प्रचण्डले दुइ पार्टीबीचका कार्यकर्ताबीच झडप भएका घटनालाई नजिकबाट पहिल्याएर दोषीलाई कारवाही गर्ने बताउनुभयो । नेकपा एमाले र माओवादीबीच चुनावी अभियानका क्रममा विभिन्न आरोप प्रत्यारोप एवंम् झडप बढी रहेकै बेला तालमेलको बारेमा छलफल भएपछि चुनावमा झडप कम हुने आशा पलाएको छ ।