बेलायतको राजधानी लन्डन युरोपेली सहरमध्ये सबैभन्दा महंगो र फोहोर सहर रहेको बुधबार प्रकाशित एक सर्वेक्षणले देखाएको छ । सोही अध्ययनले अर्को युरोपेली सहर ब्रसेल्सलाई वाक्कलाग्दो सहर भनेको छ । टि्रप एडभाइजर संस्थाले एक हजार एक सयजना पर्यटकसँग लिएको अन्तरवार्ताका आधारमा उक्त निर्कर्षनिकालेको हो ।

यसैगरी फ्रान्सको राजधानी सहर पेरिसका मानिस अन्य युरोपेली सहरका तुलनामा काम मित्रवत् पाइएको पर्यटकले बताएका छन् । तर उनीहरुले आफूहरुलाई पेरिसले आकर्षण गरेको पनि बताएका छन् । उनीहरुका अनुसार पेरिस युरोपको सबैभन्दा रोमान्टिक गन्तव्य तथा खाना र किनमेलका लागि जादुमय रहेको छ । लन्डनदेखि दोस्रो महंगो र फोहोर सहरमा रुसको राजधानी मस्को परेको छ ।

तर लन्डनका पनि केही विशेषता रहेका उनीहरुले बताएका छन् । विशेष गरेर रात्रीजीवन र सार्वजनिक पार्कहरुले पर्यटकको ध्यान आकर्षक गरेको उनीहरुले बताएका छन् । सर्वक्षणअनुसार युरोपको सबैभन्दा सफा सहर जुरिचलाई मानिएको छ । तर स्वीट्जरल्यान्डको यो सहर ब्रसेल्सकै हाराहारीमा वाक्कलाग्दो सहर पाइएको उनीहरुको अनुभव छ ।

किनमेलका क्रममा सबैभन्दा बढी दलाली हुने सहर प्रागलाई मानिएको छ भने त्यसपछि बुडापेस्ट र लिस्बन परेका छन् । अमेरिकी डलरको मूल्य घटे पनि सर्वेक्षणमा सहभागी हुनेमध्ये आधा अमेकिरीले यसैवर्ष युरोपको भ्रमण गर्ने आफ्नो योजना रहेको बताएका छन् । गत वर्ष पनि अमेरिकीको संख्या लगभग यति नै थियो ।