बलिउडमा मात्र होइन आमिर र शाहरुखको प्रतिस्पर्धा अब क्रिकेटमा पनि देखिने भएको छ । शाहरुख खानले इन्डियन पि्रमियर लिग -आइपिएल) को कोलकाता टोली किनेलगत्तै आमिर खानले आइपिएलको प्रतिद्वन्द्वी इन्डियन क्रिकेट लिग -आइसिएल) को ‘लाहोर वादशाह’ टोली किन्ने तयारी गरेका छन् । भारतीय सञ्चारमाध्यमले स्रोत उल्लेख गर्दै आमिरले लाहोर वादशाह किन्न लागेको बताएका हुन् ।

यसैगरी, आइसिएलको ‘मुम्बई च्याम्पस्’ टोली किनेर करिना पनि प्रीतिलाई जवाफ दिने तयारीमा छिन् । प्रीतिले साझेदारसँग मिलेर आइपिएलको दिल्ली टोली किनेकी थिइन् । आमिर र करिनाको आइसिएल टोली किन्ने तयारी अन्तिम चरणमा पुगेको पनि भारतीय सञ्चारमाध्यमले जनाएका छन् । क्रिकेटद्वारा आफ्नो फिल्मको प्रवर्द्धन गर्न खप्पीस शाहरुखकै सिको गरेका आमिरले पनि आफ्नो चलचित्रको प्रचार ‘लाहोर वादशाह’का खेलाडीद्वारा गर्न पाउने छन् ।

अब, आमिरको चलचित्रको विज्ञापनमा मोहम्मद साम्ाी र इन्जमाम उलहक देखिए अचम्म नमाने हुन्छ । लाहोर वादशाह किन्ने आमिरको तयारी अन्तिम चरणमा पुगेको र हस्ताक्षर गर्न मात्र बाँकी रहेको छ । सम्झौतामा खेलाडीलाई विज्ञापनमा उपयोग गर्न पाउने बुँदासमेत रहेको छ । टोलीका खेलाडीले पाकिस्तानमा पनि आमिरको चलचित्रको विज्ञापन गर्नुपर्नेछ । आमिर र करिनाको जी टेलिफिल्मस्का प्रमुख सुवास चन्द्रासँगको सुमधुर सम्बन्धका कारण सम्झौता हुन लागेको भारतीय सञ्चारमाध्यमको कथन छ ।