नेपाली चलचित्रकर्मीहरुले सबिधानसभा चुनावपछि देश स्थायी शान्तितर्फ उन्मुख हुने बताउदै आफूहरु पनि चुनावको तयारीमा बिभिन्न प्रकारले लाग्ने बताएका छन् । फागुन २२ गते राजधानीमा आयोजित कार्यक्रममा यस्तो धारणा राख्ने चलचित्रकर्मीमा प्रख्यात हास्यकलाकारहरु मदनकृष्ण श्रेष्ठ र हरिबंश आचार्य तथा नायक भुवन केसीलगायत थिए।

मदनकृष्ण श्रेष्ठले सबिधानसभा चुनाव सफल पार्न आफूहरुले त्यसबारे टेलिकार्यक्रम बनाइरहेको बताए । दलका नेताभन्दा अघिदेखि आफूहरु टेलिचलचित्रको माध्यमबाट संविधानसभा चुनावको पक्षमा लागेको पनि श्रेष्ठले कार्यक्रममा उल्लेख गरे । राजनीतिक दलहरुले आफ्नो हितमाभन्दा पिछडिएको वर्ग र क्षेत्रको हितमा संविधान बनाउन लाग्नुपर्ने पनि उनको भनाइ थियो ।

हरिवंश आचार्यले शासकहरुले बिगतमा आफ्ना लागि मात्र कानुन बनाएको तथा अब बन्ने संविधान सबै नेपालीले गर्व गर्नसक्ने हुनुपर्ने बताए । संविधानसभा चुनाव सफल पार्न आफूहरु आफ्नो क्षेत्रबाट लाग्ने पनि आचार्यले कार्यक्रममा उल्लेख गरे ।

कार्यक्रमका अर्का वक्ता नायक भुवन केसीले संविधानसभा चुनाव ढिलो गर्न दलहरु नै जिम्मेवार भएको बताए । कार्यक्रममा प्रकाश सायमी, युवराज लामा, केपी पाठक, दीपकराज गिरी, रेखा थापा, सिर्जना बस्नेतलगायतका चलचित्रकर्मीहरुले पनि बोलेका थिए ।