‘दाइ, मैले चुनाव जित्न कति भोट ल्याउनुपर्छ ?’ तरकारी पसलमा ग्राहक कुरिरहेकी सुजना श्रेष्ठले यस संवाददातालाई नै प्रश्न गरिन् । केही भन्न नपाउँदै उनले अर्को प्रश्न सोधिन्, ‘पैसा पनि आउँछ रे हो ?’ सुजना नुवाकोटको क्षेत्र नं. २ बाट संविधानसभाका लागि उठेकी उम्मेदवार हुन् । खानीगाउँ गाविसकी यी २४ वषर्ीयाले स्वतन्त्र उम्मेदवारका रूपमा चुनाव चिह्न कल पाएकी छिन् । तर, उनलाई चुनाव कसरी जितिन्छ, जितेपछि के गर्नुपर्छ, भन्ने केही मेसो छैन । ‘मलाई अरूले चुनाव लड भने, त्यसैले उठेकी हुँ,’ सुजनाले भनिन्, ‘तर, अरूले थाहा पाए भने लाज हुन्छ ।’

राजनीतिक आस्थाका हिसाबले सुजना कांग्रेसकी समर्थक हुन् । तर, उनी कांग्रेस केन्द्रीय सदस्य एवं अर्थमन्त्री डा. रामशरण महतको क्षेत्रबाट चुनाव लड्दै छिन् । किन ? उनको जवाफ छ, ‘कांग्रेसका दाइहरूले हाल भने, मैले पनि हालिदिएँ ।’ सुजना मात्र होइन नुवाकोटका तीनै निर्वाचन क्षेत्रमा कांग्रेस, एमाले र जनशक्ति पार्टीले आफ्नै निकटलाई स्वतन्त्र उम्मेदवार बनाएका छन् । निर्वाचन आयोगले एक उम्मेदवारले निर्वाचन प्रयोजनका लागि एउटा मात्र गाडी प्रयोग गर्न पाउने आचारसंहिता बनाएपछि दलहरूले चलाखी गर्न खोजेका हुन् ।

दलका आधिकारिक उम्मेदवारले आफ्नै पार्टीका कार्यकर्तालाई स्वतन्त्र उम्मेदवार बनाएर उनीहरूले प्रयोग गर्नपाउने सुविधा पनि आफैंले प्रयोग गर्ने चाँजो मिलाएका छन् । नुवाकोटका एमाले कार्यकर्ता यमप्रसाद पुडासैनी -गोकर्ण) ले नुवाकोटको क्षेत्र नंं ३ बाट उम्मेदवारी हालेका छन् । चुनाव प्रचार गर्नुको साटो उनी भन्छन्, ‘यो हल्ला गर्ने विषय होइन । म चुनावमा उठेको कसैले पनि थाहा नपाऊन् है !’ उनी एमालेका प्रमुख सचेतक महेन्द्रबहादुर पाण्डेको क्षेत्रबाट संविधानसभामा स्वतन्त्र उम्मेदवार बनेका हुन् । पुडासैनीको चुनाव चिह्न दमाहा रहेको छ ।

कांग्रेेसले क्षेत्र नं. ३ मा पनि आफ्नै कार्यकर्तालाई स्वतन्त्र उम्मेदवारी हाल्न लगाएको छ । विदुर नगरपालिका वडा नं. ३, विदुरका अच्युत तिमल्सिनाले उम्मेदवारी हालेका छन् । त्यस्तै जनशक्ति पार्टीका यौवन अधिकरी र सुकदेव गजुरेलले पनि स्वतन्त्र उम्मेदवारी दिएका छन् । उनीहरू दुवै नुवाकोट क्षेत्र नं. ३ का हुन् । उम्मेदवार बनेपछि उनीहरू पार्टीकै कार्यकर्ता भएकाले आफ्नो पक्षमा भोट माग्न सक्दैनन् ।